Nacida en Cangas en 1988, comeza os seus estudos musicais na Escola Municipal de Música “Inocentes Camaño” desa localidade en 1998 da man do mestre D. Antonio Budiño Durán. Accede ó Conservatorio Profesional de Música do Morrazo no ano 2003, finalizando o Grao Profesional no ano 2009 no Conservatorio Profesional “Manuel Quiroga” de Pontevedra baixo a tutela de Dna. Paula Castro, ó mesmo tempo que remata a Diplomatura de Mestre en Educación Musical na Facultade de Ciencias da Educación e do Deporte de Pontevedra. Ese mesmo ano supera tamén a proba de acceso ó Grao Superior de Música, continuando así os seus estudios musicais no Conservatorio Superior de Música de Vigo, onde evoluciona técnica e musicalmente baixo a tutela de D. Francisco Pérez, D. Roberto Noche e D. Asterio Leiva nas diferentes materias referentes ó clarinete. Ó mesmo tempo, asiste tamén a cursos e clases maxistrais con clarinetistas como Vicente Alberola, Arno Piters, Florent Héau, Darío Mariño, Andreas Sunden, Andrew Marriner e Radovan Cavallin. Así mesmo, durante o segundo cuadrimestre do curso académico 2013/2014 estuda na Akademija za Glasbo da Universidade de Ljubljana (Eslovenia), baixo a tutela do profesor Jože Kotar.Por outra banda, completa a súa formación con diferentes cursos de carácter pedagóxico, como por exemplo o Curso de Pedagoxía Musical Batucado (7/2/2015), impartido por Yvette Delhom e que a habilita para empregar dito método.Compoñente da Banda de Música “Belas Artes” de Cangas dende o ano 2002, colabora tamén con diferentes agrupacións como o grupo tradicional da Asociación “Lembranzas da Ría” de Cangas, a A. X. “Meiramar Axóuxeres” de Moaña, o grupo de baile Trébede da A.C. Loaira de Marín, e a Banda de Música Cultural de Arcade. Participa tamén na gravación de CD’s, tanto coa Asociación “Lembranzas da Ría” de Cangas co CD Baila o son (2010), como coa compañía “Circio: Música e Danza” –da que forma parte entre os anos 2008/2012– co CD Baile de Soños (2011).