Mənim arzularımın əksəriyyəti Azərbaycanın gələcəyi ilə bağlıdır.Mənə görə, bir ölkənin gələcəyinin parlaq olması onun dilinin inkişafından keçir. Dildə vahidlik, müxtəlif sahələr üzrə məlumat çoxluğu onun inkişafının əsas ünsürləridir.Universitetdə təhsil aldığım illərdən dilimizdə olan məlumatların azlığı məni narahat edirdi. Mühazirələrdəki fikir boşluqları, redaktə yoxluğu, başqa müraciət ediləcək ədəbiyyatların olmaması və s. kimi amillər məni və neçə illərdir əksər tələbələri xarici dildə nəsə axtarmağa sövq edirdi. Bu proses hələ də davam edir. Təkcə mənim ixtisasımda yox, bir çox sahələrdə belədir vəziyyət.Neft sənayesində işə başlayanda universitetdə öyrəndiklərim köməyimə çatsa da, nəyinsə əksikliyini də hiss edirdim. İlk təzad elə işlədiyim ixtisasla əlaqəli yarandı. Qazma geoloqu işləyirdim, amma “Qazma geologiyası” ilə bağlı bir kitab yox idi dilimizdə. Qazmaya və geologiyaya aid ayrılıqda kitablar olsa da, bir qazma geoloqunun bilməli olduqlarını əhatən edən vəsait yox idi. Hələ də yoxdur.Həm dilimizdə olan keyfiyyətli məlumatların artırılması, həm də ixtisasımla əlaqədar kombinə edilmiş məlumatların daha çox insana çatması üçün 2023-cü ilin mart ayında Linkedin platformasında paylaşımlar etməyə başladım. Bu paylaşımlarda ilk əvvəl sırf qazma və geologiya sahəsinin sahiblərinə və bu ixtisaslarda təhsil alan tələbələrə fokuslansam da, zaman keçdikcə qeyri-ixtisas sahiblərini də nəzərə almağın daha düzgün olduğu qənaətinə gəldim və ixtisasımla əlaqəli məlumatları gündəlik həyatla əlaqələndirdim.Beləliklə, qazma və geologiyanı hər kəs üçün anlaşılan etməyə çalışaraq, Linkedin macərama davam edirəm. Ümid edirəm, faydalı olar.