Formado no eido das Ciencias, tardei tempo en decatarme de que o meu eran as palabras. As historias viaxeiras dun típico estudiante Erasmus, convertíronse nas miñas primeiras crónicas. E de Polonia, a Corcubión, un cambio radical para un rapaz criado no seo dunha familia urbana coruñesa.Dende 2007 “coido” o diario dixital da Costa da Morte Que pasa na Costa. Fun aprendendo polo camiño, primeiro no seo da empresa Galinus, Taller de Comunicación, e dende 2011 como autónomo. Redacción, investigación, community manager, traballo comercial, administrativo, de coordinación, de recursos humanos... e escribir, sobre todo escribir, que é o que me gusta. Nun proxecto coma este, cómpre facer de todo, pero o máis gratificante é poder falar cun alcalde ou un responsable da Xunta, de igual xeito que o fas co último veciño do lugar máis recóndito dun concello esquecido do occidente galego.O trato directo ca xente e a miña experiencia no mundo das novas tecnoloxías permítenme facer outra das cousas que me fascinan: a formación. A alfabetización dixital (un reto común con QPC ) con pequenos, maiores ou colectivos desfavorecidos é un desafío cheo de ilusión. Traballo para Concellos, Asociacións, e entidades como a Cruz Vermella ou a Fundación Érguete, e os cursos impartidos a colectivos de redeiras, desempregados, inmigrantes ou presos, convírtense en experiencias de aprendizaxe infinita.