LEAD Albania

Programi për Përvojë dhe Zhvillim Lidershipi “LEAD Albania” është një nismë e Fondacionit Shqiptaro-Amerikan për Zhvillim (AADF). Programi “LEAD Albania” është konceptuar bazuar në Programin e Shtëpisë së Bardhë për Lidershipin (angl. White House Fellows Program) në Shtetet e Bashkuara të Amerikës. Qëllimi i Programit në Shqipëri është që t’u sigurojë profesionistëve të rinj dhe të talentuar shqiptarë përvoja të drejtpërdrejta në procesin e qeverisjes së Shqipërisë, shoqëruar nga një ndjesi e përfshirjes personale në lidershipin e shoqërisë sonë nëpëmjet një përvoje njëvjeçare që e vendos përfituesin në një pozicion shumë të lartë në institucione shtetërore. Individëve të përzgjedhur do t’u ofrohet mundësia për të punuar në pozicione të larta në stafet drejtuese të institucioneve të larta shtetërore si Kryeministria, Institucioni i Presidentit, Ministritë, Banka e Shqipërisëe apo Bashkia e Tiranës. Vendimet për pozicionet do të merren mbi bazën e interesave dhe përvojës së aplikantëve. Përvoja e punës për pjesëmarrësit do të pasurohet me një komponent trajnimi, ku në një seri seminaresh do të trajtohen tema si integrimi evropian, politikat publike, vendimmarrja, politika e jashtme, politika të sigurisë apo zhvillimi i kompetencave sociale dhe i aftësive të lidershipit.