Proxecto Lugares

Proxecto Lugares é unha iniciativa de pensamento contemporáneo, aprendizaxe e intervención paisaxística que se desenvolve no espazo público do Camiño de Santiago. O proxecto nace na primavera de 2023 a través dunhas xornadas de debate e dun taller en dous puntos específicos da ruta xacobea: Palas de Rei (Lugo), localidade situada no Camiño Primitivo, e Seadur (Larouco, Ourense), lugar próximo ao Camiño de Inverno. O obxectivo do Proxecto Lugares é que teña continuidade até 2027, o vindeiro Ano Santo. Obxectivos - Xerar pensamento e narrativas contemporáneas arredor do coidado, embelecemento e uso de materiais naturais e sostibles no espazo público da ruta xacobea tendo presente ás persoas peregrinas e á veciñanza dos lugares polos que transita. - Transmitir o coñecemento e técnicas de intervención na paisaxe ás comunidades locais dos territorios polos que discorre o Camiño de Santiago. - Deseñar, da man das comunidades locais, unha intervención artística sostible e coa ollada posta na arquitectura da paisaxe e a artesanía contemporánea para xerar novas experiencias no espazo público do Camiño de Santiago. - Favorecer a creación de comunidade a través de procesos culturais vinculados á intervención na paisaxe desde unha mirada transdisciplinar.