Lignum Facile Responde

Lignum Facile Responde é unha plataforma web para fomentar o uso e emprego da madeira no sector da construción, elaborada polo Cluster da Madeira e o Deseño de Galicia e a Axencia Galega da Industria Forestal. Deste xeito, preténdese dar debida resposta á demanda das arquitectas e arquitectos de Galicia en materia do uso da madeira en construción, creando un espazo compartido entre prescritores, aparelladores, tecnólogos, instaladores e fabricantes de madeira na nosa comunidade que permita impulsar o uso deste material na construción de edificios públicos e de promoción privada desde o coñecemento compartido. En concreto, búscase dar a coñecer as vantaxes que ofrece a madeira como material de construción, aclarando cuestións como o custo do seu mantemento, a súa durabilidade e a súa protección fronte aos incendios ou fenómenos naturais como episodios sísmicos. A plataforma web posúe diferentes seccións, entras as que destaca o apartado de consultas. Nel, os tecnólogos do Centro de Innovación e Servizos Tecnolóxicos da Madeira (CIS Madeira) e do Cluster da Madeira e o Deseño de Galicia darán respostas ás dúbidas e consultas que poidan ter as arquitectas e arquitectos en canto ao uso da madeira en construción. Ademais, ditas respostas elaboradas poderán posteriormente consultarse de forma pública.